— 457 —
article CLXVI.
De la Securité et du Desespoir.
Et jamais l'une de ces Passions n'accompagne le
Desir, qu'elle ne laisse quelque place à l'autre. Car
lors que l'Esperance est si forte, qu'elle chasse entierement
la Crainte, elle change de nature et se nomme
Securité ou Assurance. Et quand on est assuré que ce
qu'on desire aviendra, bien qu'on continuë à vouloir
qu'il aviene, on cesse neantmoins d'estre agité de la
Passion du Desir, qui en faisoit rechercher l'evenement
avec inquietude. Tout de mesme, lors que la Crainte
est si extreme, qu'elle oste tout lieu à l'Esperance, elle
se convertit en Desespoir; et ce Desespoir, representant
la chose comme impossible, esteint entierement le
Desir, lequel ne se porte qu'aux choses possibles.
Descartes Pas 457