— 449 —
article CLVIII.
Que ses effets sont contraires à ceux de la Generosité.
Mais quelle que puisse estre la cause pour laquelle
on s'estime, si elle est autre que la volonté qu'on sent
en soy mesme, d'user tousjours bien de son libre
arbitre, de laquelle j'ay dit que vient la Generosité,
elle produit tousjours un Orgueil tres blasmable,
et qui est si different de cette vraye Generosité, qu'il a
des effets entierement contraires. Car tous les autres
biens, comme l'esprit, la beauté, les richesses, les
honneurs, etc., ayant coustume d'estre d'autant plus
estimez, qu'ils se trouvent en moins de personnes, et
mesme estant pour la plus part de telle nature, qu'ils
ne peuvent estre communiquez à plusieurs: cela fait
que les orgueilleux taschent d'abaisser tous les autres
hommes, et qu'estant esclaves de leurs Desirs, ils ont
l'ame incessamment agitée de Haine, d'Envie, de
Ialousie, ou de Colere.
Descartes Pas 449