— 411 —
article CXII.
Quels sont les signes exterieurs de ces Passions.
Ce que j'ay mis icy, fait assez entendre la cause des
differences du poulx, et de toutes les autres proprietez
que j'ay cy dessus attribuées à ces passions, sans qu'il
soit besoin que je m'areste à les expliquer davantage.
Mais pource que j'ay seulement remarqué en chacune
ce qui s'y peut observer lors qu'elle est seule, et qui sert
à connoistre les mouvemens du sang et des esprits qui
les produisent, il me reste encore à traiter de plusieurs
signes exterieurs, qui ont coustume de les accompagner,
et qui se remarquent bien mieux lors qu'elles
sont meslées plusieurs ensemble, ainsi qu'elles ont
coustume d'estre, que lorsqu'elles sont separées. Les
principaux de ces signes sont les actions des yeux
et du visage, les changemens de couleur, les tremblemens,
la langeur, la pasmoison, les ris, les larmes,
les gemissemens, et les soupirs.
Descartes Pas 411