— 6 —
      Or i'ay travaillé de tout mon possible pour comprendre dans ce
Traité tout ce qui s'en peut dire. Ce n'est pas que i'aye icy ramassé
toutes les diverses raisons qu'on pourroit alleguer pour servir de
preuve à nostre sujet: car ie n'ay iamais creu que cela fust necessaire,
sinon lors qu'il n'y en a aucune qui soit certaine; mais
seulement i'ay traité les premieres et principales d'une telle maniere,
que i'ose bien les proposer pour de tres-evidentes et tres-certaines
demonstrations. Et ie diray de plus qu'elles sont telles, que
ie ne pense pas qu'il y ait aucune voye par où l'esprit humain en
puisse iamais découvrir de meilleures; car l'importance de l'affaire,
et la gloire de Dieu à laquelle tout cecy se raporte, me contraignent
de parler icy un peu plus librement de moy que ie n'ay de coustume.
Descartes Meds 6